දවසකට පැය 8කට වඩා නිදාගන්න එක හොඳ නැද්ද?

සාමාන්‍යයෙන් නීරෝගී වැඩිහිටි පුද්ගලයෙකුට දවසකට පැය 7- 9ක් අතර කාලයක නින්දක් අවශ්‍ය වෙනවා කියල තමා සඳහන් වෙන්නෙ. මේකෙ මැද අගයක් විදිහට තමා පැය 8ක කාලයක නින්දක් අවශ්‍යයි කියන්නේ.

පැය 9 ඉක්මවලා දිගින් දිගටම අවුරුදු 18ට  වැඩි කෙනෙකුට නින්ද අවශ්‍ය වෙනවා කියන එක නම් හිතකර දෙයක් විදියට වෛද්‍යවරු සලකන්නේ නැහැ. ඒක ආතතිය,පාකින්සන් රෝගය,අධික තරබාරුබව වගේ රෝග රාශියක මූලික ලක්‍ෂණයක් වෙන්න පුළුවන්.

අපි හරියටම ඒක උදාහරණයකින් පැහැදිලි කර ගත්තොත්, අපේ ශරීරය වාහනයක් නම්, නින්ද කියන්නෙ හරියට ඒක අලුත්වැඩියාවට යොමු කරන වෙලාව වගේ.හැම රෑකම නිදාගන්න වෙලාවට අපේ ඇඟ ඇතුලේ එක එක අලුත්වැඩියාවල් සිද්ධ වෙනවා. පටක,අස්ථි, සන්ධි,පේශි,මොළය වගේම DNA ත් අලුත්වැඩියාවට ලක්වෙනවා.ඉතින් වෙලා තියෙන හානිය වැඩියි නම් අලුත් වැඩියාවට ගතවෙන කාලයත් වැඩියි. 

ඉතින් ඒ වගේමයි, දිගුකාලීනව දිගු නින්දක් නිදාගන්න එකෙන් හෘදයාබාධ,දියවැඩියාව වගේ රෝග වැළඳීමේ අවදානමත්  වැඩි කරනවාලු. 

ඉතින් කොහොම බැලුවත්,පැය 8-9කට වඩා අවුරුදු 18කට වැඩි පුද්ගලයෙක් දිගු කාලීනව නිදාගන්න එක නම් හොඳ දෙයක් නෙමෙයි.ඒ නිසාම එහෙම ප්‍රශ්නයක් තියෙන කෙනෙක් ඉන්නවා නම් ඒ ගැන වෛද්‍ය උපදෙස් ගන්න එක තමා සුදුසු. 

මූලාශ්‍ර

https://www.healthline.com/health/sleep/disorders#symptoms

https://www.hopkinsmedicine.org/health/wellness-and-prevention/oversleeping-bad-for-your-health

https://www.sleepfoundation.org/how-sleep-works/oversleeping

රෑට පිපෙන මල් සුදු පාට ඇයි?

 රෑට පිපෙන මල් සුදු පාට ඇයි? 

සුදු වර්ණය  හඳ එළිය පරාවර්තනය කරමින් රාත්‍රියේ ඇති අඳුරු පසුබිමේ මල පැහැදිලිව දකින්න උදව් වෙනවා. මේක වවුලන්, සළඹයන් සහ අනෙකුත් රාත්‍රියේ පියාඹමින් මල් පරාගණයට උදව් වෙන සතුන්ට මල් පහසුවෙන් හොයාගන්න උදව් වෙනවා. 

එනිසා රාත්‍රියේ පිපෙන බොහෝ පුෂ්ප සුදු පැහැයෙන් යුක්ත වෙනවා.

මෙයට අමතරව, සුදු පාට මල්වලට, මල් වර්ණ ගන්වන්න  උපකාරී වන වර්ණක නිපදවන්න අවශ්‍ය වෙන ශක්තිය වැය කරන්න ඕනෙ නැති නිසා එම ශක්තිය ශාකයේ ‍ප්‍රජනනයට අවශ්‍ය වන වෙනත් කාර්යයන් සඳහා යොදවන්නත් පුළුවන් වෙනවා.

TV බලන ගමන් කෑම කන එක නරකයි කියන්නෙ මොකද?

 TV බලන ගමන් කෑම කන එක නරකයි කියන්නෙ මොකද?

රූපවාහිනිය බලන ගමන් ආහාර ගන්න එක ආකාර කිහිපයකින්ම අහිතකර වෙන්න පුළුවන්.

පළවෙනියටම ඔයාගේ අවධානය තියෙන්නේ රූපවාහිනියේ නිසා මොළයට බඩ පිරීම ගැන සංඥා හරියට ගමන් කරන්නේ නැහැ. එතකොට ඔයාගේ බඩ පිරිලත් ඔයා ආහාර ගන්න යොමු වෙන්න පුළුවන්.මේ ක්‍රියාවලිය දිගින් දිගටම සිදුවීම නිසා තරබාරුකම වගේ ගැටලු ඇතිවෙන්න පුළුවන්.

ඒ වගේම ආහාරයේ රසය,පාට ගැන අවධානය හරියට නැති නිසා ආහාරයෙන් ලැබෙන නියම තෘප්තිය නොලැබෙන්නත් පුළුවන්. 

රූපවාහිනිය බලමින් ආහාර ගැනීමේදී ආහාරය ගැන  සම්පූර්ණ අවධානය නැති නිසා ආහාරය හොඳින් හපන්නේ නැතිව ගිලීමට යොමුවෙන්න පුළුවන්.ඒ වගේම,ආහාර ජීර්ණයේදී ක්‍රියාත්මක වෙන්නේ අපේ  ප්‍රත්‍යානුවේගී ස්නාය පද්ධතිය.රූපවාහිනියේ තියෙන ත්‍රාසය,කෝපය ,භිතිය දනවන දේවල් නැරඹීමේදී උත්තේජනය වෙන්නේ අපේ අනුවේගී ස්නායු පද්ධතිය.මේ හේතු නිසා අපේ ආහාර ජීර්ණ ක්‍රියාවලියට බාධා ඇතිවෙලා බඩ පිපීම වගේ ආහාර ජීර්ණය ආශ්‍රිත ගැටළු මතුවෙන්න පුළුවන්.  

මේ වගේම, එකපාර කාර්යයන් දෙකක් කරන්නට සිදුවීම නිසා අපේ මොළයට මේ දෙකෙන්  එකක්වත් හරියට කරගන්න බැරිවෙනවා.මේක දීර්ඝ කාලීනව සිදුවීමේ ප්‍රතිඵලයක් විදිහට අවධානය පවත්වා ගැනීමේ දුර්වලතා මතුවෙන්නත් පුළුවන්. 

මේ හැමදේම හන්දා, ආහාර ගනිද්දී තමන් ආහාර ගන්නවා කියන එකට අවධානයෙන් ආහාර ගැනීම තමා සෞඛ්‍යමත් වෙන්නේ.

සැකසුම :- ගයංගි දෙල්ගොඩ